ತುಳು ಕೇವಲ ಒಂದು ಭಾಷೆಯಲ್ಲ; ಅದು ತೌಳವ ನಾಡಿನ ಅಸ್ಮಿತೆ, ಸಂಸ್ಕೃತಿ ಮತ್ತು ಸಾವಿರಾರು ವರ್ಷಗಳ ಬದುಕಿನ ಪ್ರತಿಬಿಂಬ. ಸ್ವತಂತ್ರ ಲಿಪಿ, ಶ್ರೀಮಂತ ಸಾಹಿತ್ಯ ಪರಂಪರೆ, ದೈವಾರಾಧನೆ, ನಾಗಾರಾಧನೆ, ಯಕ್ಷಗಾನ, ತಾಳಮದ್ದಳೆ ಸೇರಿದಂತೆ ಅನೇಕ ವಿಶಿಷ್ಟ ಸಾಂಸ್ಕೃತಿಕ ಆಚರಣೆಗಳನ್ನು ತನ್ನೊಳಗೆ ಜೀವಂತವಾಗಿಟ್ಟುಕೊಂಡಿರುವ ತುಳು, ತುಳುನಾಡಿನ ಜನಜೀವನದ ಅವಿಭಾಜ್ಯ ಅಂಗವಾಗಿದೆ.
ವೀರರಾಣಿ ಅಬ್ಬಕ್ಕ, ಕೋಟಿ-ಚೆನ್ನಯರು ಸೇರಿದಂತೆ ತುಳುನಾಡಿನ ವೀರ ಪರಂಪರೆ ಹಾಗೂ ಪಂಜುರ್ಲಿ ಸೇರಿದಂತೆ ದೈವಾರಾಧನಾ ಪರಂಪರೆಯ ಮಹತ್ವವನ್ನು ಅರಿತುಕೊಂಡು ಮಾತನಾಡಬೇಕಾಗಿದೆ. ತುಳುವರು ಕನ್ನಡದೊಂದಿಗೆ ಅವಿನಾಭಾವ ಸಂಬಂಧ ಹೊಂದಿದ್ದು, ಕನ್ನಡ ಭಾಷೆ ಮತ್ತು ಕರ್ನಾಟಕದ ಸಾಂಸ್ಕೃತಿಕ ಬೆಳವಣಿಗೆಗೆ ತಮ್ಮದೇ ಆದ ಮಹತ್ವದ ಕೊಡುಗೆ ನೀಡಿದ್ದಾರೆ.
ಕನ್ನಡ ನಾಡಿನ ಏಕತೆ ಮತ್ತು ಅಖಂಡತೆಯ ವಿಚಾರದಲ್ಲಿಯೂ ತುಳುವರ ಕೊಡುಗೆಯನ್ನು ಮರೆಯಲು ಸಾಧ್ಯವಿಲ್ಲ. ಕಾಸರಗೋಡು ಸೇರಿದಂತೆ ಗಡಿಭಾಗಗಳ ಕನ್ನಡಪರ ಹೋರಾಟಗಳಲ್ಲಿ ತುಳುವರು ನೀಡಿದ ಬೆಂಬಲ ಮತ್ತು ತ್ಯಾಗದ ಇತಿಹಾಸವನ್ನು ತಿಳಿದುಕೊಳ್ಳುವುದು ಅಗತ್ಯವಾಗಿದೆ.
ಭಾರತದ ಅನೇಕ ಭಾಷೆಗಳು ಸಂವಿಧಾನದ ಎಂಟನೇ ಪರಿಚ್ಛೇದದಲ್ಲಿ ಸ್ಥಾನ ಪಡೆದಿವೆ. ಅದೇ ರೀತಿ ತುಳು ಭಾಷೆಗೂ ಸಂವಿಧಾನದ ಎಂಟನೇ ಪರಿಚ್ಛೇದದಲ್ಲಿ ಸ್ಥಾನ ದೊರೆಯಬೇಕು ಎಂಬುದು ತುಳುವರ ಬಹುಕಾಲದ ನ್ಯಾಯಸಮ್ಮತ ಬೇಡಿಕೆಯಾಗಿದೆ. ಇದು ಯಾವುದೇ ಭಾಷೆಯ ವಿರುದ್ಧದ ಬೇಡಿಕೆಯಲ್ಲ; ತುಳು ಭಾಷೆಯ ಅಸ್ತಿತ್ವ, ಅಭಿವೃದ್ಧಿ ಮತ್ತು ರಾಷ್ಟ್ರೀಯ ಮಾನ್ಯತೆಗಾಗಿ ನಡೆಯುತ್ತಿರುವ ಹಕ್ಕಿನ ಹೋರಾಟವಾಗಿದೆ.
ಪ್ರತಾಪ್ ಸಿಂಹರವರ ಹೇಳಿಕೆಗಳು ತುಳುವರ ಮನಸ್ಸಿಗೆ ನೋವುಂಟು ಮಾಡಿವೆ. ಇದು ಕೇವಲ ಒಂದು ಭಾಷೆಯ ವಿಚಾರವಲ್ಲ. ತುಳುನಾಡಿನ ದೈವಾರಾಧನೆ, ನಾಗಾರಾಧನೆ, ಯಕ್ಷಗಾನ, ವೀರಪುರುಷರ ಪರಂಪರೆ ಹಾಗೂ ತೌಳವ ಸಂಸ್ಕೃತಿಯೊಂದಿಗೆ ನಿಕಟವಾಗಿ ಬೆಸೆದುಕೊಂಡಿರುವ ಭಾವನೆಗಳ ವಿಚಾರವಾಗಿದೆ.
ಆದ್ದರಿಂದ ಪ್ರತಾಪ್ ಸಿಂಹರವರು ತಮ್ಮ ಹೇಳಿಕೆ ಹಾಗೂ ನಿಲುವನ್ನು ಮರುಪರಿಶೀಲಿಸಬೇಕು. ತುಳುವರ ಭಾವನೆಗಳನ್ನು ಗೌರವಿಸಿ, ತೌಳವ ಮಾತೆಯ ಮುಂದೆ ಕ್ಷಮೆಯಾಚಿಸಬೇಕು. ಮುಂದಿನ ದಿನಗಳಲ್ಲಿ ತುಳು ಭಾಷೆಯ ಸಂರಕ್ಷಣೆ, ಅಭಿವೃದ್ಧಿ ಹಾಗೂ ಸಂವಿಧಾನದ ಎಂಟನೇ ಪರಿಚ್ಛೇದದಲ್ಲಿ ರಾಷ್ಟ್ರೀಯ ಮಾನ್ಯತೆ ದೊರಕಿಸುವ ಹೋರಾಟಕ್ಕೆ ಸಹಕರಿಸಬೇಕು ಎಂದು ಯೋಗೀಶ್ ಶೆಟ್ಟಿ ಜಪ್ಪು ಆಗ್ರಹಿಸಿದ್ದಾರೆ.
ತುಳು ನಮ್ಮ ಮಾತೃಭಾಷೆ ಮಾತ್ರವಲ್ಲ — ಅದು ನಮ್ಮ ಅಸ್ಮಿತೆ, ನಮ್ಮ ಸಂಸ್ಕೃತಿ ಮತ್ತು ನಮ್ಮ ತೌಳವ ಬದುಕಿನ ಜೀವನಾಡಿ.
— ಯೋಗೀಶ್ ಶೆಟ್ಟಿ ಜಪ್ಪು
ಸ್ಥಾಪಕಾಧ್ಯಕ್ಷರು, ತುಳುನಾಡ ರಕ್ಷಣಾ ವೇದಿಕೆ (ರಿ)
About The Author
