ಕಣ್ಣೂರು: ಕಣ್ಣೂರು ಕೋಟೆ ನೋಡಲು ಮನೆಯಿಂದ ಹೊರಟಿದ್ದ 19 ವರ್ಷದ ಪದವಿ ವಿದ್ಯಾರ್ಥಿನಿ ಹಜರತ್ ನಾಪತ್ತೆಯಾಗಿ ಬರೋಬ್ಬರಿ 10 ವರ್ಷ ಕಳೆದರೂ, ಆಕೆಯ ಸುಳಿವು ಇನ್ನೂ ಪತ್ತೆಯಾಗಿಲ್ಲ. ಮಗಳಿಗಾಗಿ ವರ್ಷಗಳಿಂದ ಕಾದಿರುವ ತಂದೆ ಮುಹಮ್ಮದಲಿ ಇದೀಗ ಮತ್ತೊಮ್ಮೆ ಪೊಲೀಸರ ಮೊರೆ ಹೋಗಿದ್ದು, ಗೃಹ ಸಚಿವರಿಗೆ ದೂರು ಸಲ್ಲಿಸಿ ತನಿಖೆಯನ್ನು ಚುರುಕುಗೊಳಿಸುವಂತೆ ಮನವಿ ಮಾಡಿದ್ದಾರೆ.
2016ರ ಸೆಪ್ಟೆಂಬರ್ 18 ಕುಟ್ಟಿಯತ್ತೂರಿನ ಮುಹಮ್ಮದಲಿ ಅವರ ಕುಟುಂಬಕ್ಕೆ ಮರೆಯಲಾಗದ ದಿನ. ಕಣ್ಣೂರು ಕೋಟೆ ವೀಕ್ಷಿಸಲು ಮನೆಯಿಂದ ಹೊರಟಿದ್ದ 19 ವರ್ಷದ ಹಜರತ್ ಬಳಿಕ ಮನೆಗೆ ಮರಳಲಿಲ್ಲ. ಮಗಳು ಕಾಣೆಯಾಗಿರುವುದು ತಿಳಿಯುತ್ತಿದ್ದಂತೆ ಆತಂಕಗೊಂಡ ಕುಟುಂಬ ಮಯ್ಯಿಲ್ ಪೊಲೀಸರಿಗೆ ದೂರು ನೀಡಿತು.ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ಹುಡುಕಾಟ ಆರಂಭಿಸಿದರು. ಕಣ್ಣೂರು ಸೇರಿದಂತೆ ವಿವಿಧ ಪ್ರದೇಶಗಳಲ್ಲಿ ಯುವತಿಗಾಗಿ ಶೋಧ ನಡೆಸಲಾಯಿತು. ಆದರೆ ವರ್ಷಗಳು ಕಳೆದರೂ ಹಜರತ್ಳ ಸುಳಿವು ಮಾತ್ರ ಪತ್ತೆಯಾಗಲಿಲ್ಲ.
ಹಜರತ್ ಕಣ್ಣೂರು ಕೋಟೆಗೆ ತೆರಳಿದ್ದ ಬಳಿಕ ಏನಾಯಿತು? ಆಕೆ ಎಲ್ಲಿಗೆ ಹೋದಳು? ಯಾರನ್ನಾದರೂ ಭೇಟಿಯಾಗಿದ್ದಳೇ? ಆಕೆಯ ನಾಪತ್ತೆಯ ಹಿಂದೆ ಯಾವುದಾದರೂ ಕಾರಣವಿದೆಯೇ? ಎಂಬ ಹಲವು ಪ್ರಶ್ನೆಗಳು ಕುಟುಂಬವನ್ನು ಇಂದಿಗೂ ಕಾಡುತ್ತಿವೆ.
ಪ್ರಕರಣದ ತನಿಖೆಯಿಂದ ನಿರೀಕ್ಷಿತ ಫಲಿತಾಂಶ ದೊರಕಿಲ್ಲ ಎಂದು ತಂದೆ ಮುಹಮ್ಮದಲಿ ಆರೋಪಿಸಿದ್ದಾರೆ. ಈ ಹಿಂದೆ ಅಂದಿನ ಮುಖ್ಯಮಂತ್ರಿ ಪಿಣರಾಯಿ ವಿಜಯನ್ ಸೇರಿದಂತೆ ಹಲವು ಅಧಿಕಾರಿಗಳಿಗೆ ದೂರು ಸಲ್ಲಿಸಿದ್ದರೂ ಮಗಳ ಪತ್ತೆಯಾಗಿಲ್ಲ ಎಂದು ಅವರು ತಿಳಿಸಿದ್ದಾರೆ.
ಮಗಳು ಜೀವಂತವಾಗಿದ್ದಾಳೆ ಎಂಬ ನಂಬಿಕೆಯನ್ನು ಮುಹಮ್ಮದಲಿ ಇನ್ನೂ ಕಳೆದುಕೊಂಡಿಲ್ಲ. ಯಾವುದೇ ಬೆಲೆ ತೆತ್ತಾದರೂ ಮಗಳನ್ನು ಪತ್ತೆಹಚ್ಚಿ ಕುಟುಂಬದ ಮುಂದೆ ಕರೆತರಬೇಕು ಎಂಬುದು ಅವರ ಆಗ್ರಹ.ಹೀಗಾಗಿ ವರ್ಷಗಳ ಬಳಿಕ ಮತ್ತೊಮ್ಮೆ ಗೃಹ ಸಚಿವರನ್ನು ಸಂಪರ್ಕಿಸಿರುವ ಅವರು, ಪ್ರಕರಣದ ತನಿಖೆಯನ್ನು ಪರಿಣಾಮಕಾರಿಯಾಗಿ ಮುಂದುವರಿಸಿ ಹಜರತ್ಳ ಪತ್ತೆಗೆ ಅಗತ್ಯ ಕ್ರಮ ಕೈಗೊಳ್ಳುವಂತೆ ಮನವಿ ಮಾಡಿದ್ದಾರೆ.ಒಂದು ದಶಕ ಕಳೆದರೂ ಉತ್ತರ ಸಿಗದ ಈ ನಾಪತ್ತೆ ಪ್ರಕರಣ ಇದೀಗ ಮತ್ತೊಮ್ಮೆ ಮುನ್ನೆಲೆಗೆ ಬಂದಿದೆ. ಹಜರತ್ಳಿಗೆ ನಿಜವಾಗಿ ಏನಾಯಿತು ಎಂಬ ಪ್ರಶ್ನೆಗೆ ತನಿಖೆಯೇ ಉತ್ತರ ನೀಡಬೇಕಿದೆ.
About The Author
